पोखरा, १६ फागुन ।
श्रवण दृष्टिविहीन अपांगता भएका व्यक्तीहरुको एसिया सम्मेलन पोखरामा हुने भएको छ । सम्मेलन यही फागुन १७, १८ र १९ गते पोखरामा हुन लागेको आयोजकले शुक्रबार पत्रकार सम्मेलन गरेर जानकारी दिएको छ ।
अपाङगताको क्षेत्रमा काम गर्ने अन्तराष्ट्रिय संस्था डेफलाइन इन्टरनेशनल, एनडी आइ एन, एनएबी, बहिरा– श्रदृष्टिविहिन अभिभावक संघ, श्रवण दृष्टिविहन संघ, नेपाल र सेन्स इन्टरनेशनल भारतको आयोजनामा सम्मेलन हुन लागेको हो ।
नवप्रवर्तनशील श्रवण दृष्टिविहीन समावेशीकरणः शिक्षा, रोजगार र सामुदायीक सहभागिता भन्ने मुख्य विषयबस्तुमा आधारित रहेर संचालन हुने छ । ६८ वटा प्रस्तुतिकरण र ३ सेसनमा छलफल हुने छ ।
सम्मेलनमा नेपाल लगायत विश्वभरका दृष्टि र श्रवण दुबै क्षमतामा चुनौति भएका व्यक्ती, श्रवण दृष्टिविहिन व्यक्ती, उनिहरुका परिवार, शिक्षक, अनुसन्धानकर्ता, विज्ञ, अधिकारकर्मी, नीति निर्माता र सरकारी अधिकारीहरु सहभागी हुने डेफलाइन इन्टरनेशनलका अध्यक्ष मिर्कोले जानकारी दिए ।
मिर्कोले श्रवण र दृष्टि दुबै गुमाएका संसारभरका व्यक्तीहरु बहिष्करणमा परेको बताए । यसका लागि जनचेतना फैलाउन र अझै धेरै काम गर्न वाकीँ रहेको मिर्कोले जानकारी दिए ।
श्रवण दृष्टिविहिन संघका केन्द्रीय उपाध्यक्ष पुष्पराज रिमालले श्रवण दृष्टिविहिनहरुका लागि शिक्षा रोजगार र अवसरको खाँचो रहेको बताए ।
राष्ट्रिय वहिरा महासंघकी वरिष्ठ उपाध्यक्ष सत्यदेवी वाग्लेलेका अनुसार सम्मेलनमा २२ देशबाट प्रतिनिधि र सरोकारवालाहरु गरी करिब ३ सय जना पोखरा आइपुगेका छन् ।
नेपाल नेत्रहिन संघका अध्यक्ष शिशिर खनालले श्रवण दृष्टिविहीन अपांगता भएका व्यक्तिहरूलाई सीपमूलक, आयमूलक कार्यमा लगाउन पनि छुवाइ नै एकमात्र उपाय रहेको बताए । उनिहरु अन्य अपाङगता भएका व्यक्ती भन्दा १० गुणा कम शिक्षा र रोजगारमा अवसर पाउने गरेको र निकै पछि रहेको हुदाँ उनिहरुका लागि पहिला शिक्षाको खाँचो रहेको खनाले बताए ।
नेपालमा ५ ठाँउमा मात्रै श्रवण दृष्टिविहीनका लागि स्रोत स्कुल सुरु भएको छ ।
श्रवण र दृष्टि दुबै गुमाएका व्यक्तिहरू कान सुन्न, आँखा देख्न सक्दैनन् । विश्व स्वास्थ्य संगठनको परिभाषा अनुसार प्रत्येक एक हजार मानिसमध्ये एक जनालाई यो अपांगता हुने सम्भावना रहन्छ ।
सम्मेलनले सहाभागिहरुलाई ज्ञान आदान–प्रदान, नवीन विचारहरु निर्माण र समावेशी प्रवद्र्धनमा महत्वपूर्ण भूमिका खेल्ने आयोजकको अपेक्षा छ ।
