१३ फागुन, पोखरा ।
जि एण्ड के इन्टरनेसनल एजुकेशन कन्सल्टेन्ट पोखराले विद्यार्थीलाई पोशाक वितरण गरेको छ । जि एण्ड केले छैटौँ वार्षिकोत्सवको अवसरमा पोखरा महानगरपालिका ४ गैहपाटनमा रहेको नविन माविमा अध्यनरत ५० विद्यार्थीलाई एक÷एक सेट विद्यालय पोशाक वितरण गरेको हो ।
विद्यालयमा आयोजित एक कार्यक्रमकाबिच पोखरा महानगरपालिका वडानम्बर ४ वडाध्यक्ष देवकृष्ण पराजुली, नविन माविका प्रधानाध्यापक शिरोमणी लामिछाने, विद्यालय व्यवस्थापन समितिका सदस्य बसन्त प्रसाद पराजुली र जि एण्ड केका संचालक राजन पन्थीले विद्यार्थीलाई पोशाक वितरण गरे ।
कार्यक्रममा बोल्दै वडाध्यक्ष पराजुलीले सरकारी विद्यालयमा अध्यन गर्ने विद्यार्थीलाई प्रोत्साहनको खाँचो रहेको बताए । शैक्षिक परामर्श दिने संस्थाले सामाजिक उत्तरदायीत्व अन्तरगत पोशाक सहयोग गरेकोमा अध्यक्ष पराजुलीले आभार व्यक्त गरे । सरकारी विद्यालयमा अध्यन गर्ने विद्यार्थीको शैक्षिक गुणस्तर सुधार गर्न अभिभावकले पनि चासो दिनुपर्ने पराजुलीको भनाई थियो ।
विद्यालयका प्रधानाध्यापक शिरोमणी लामिछानेले विद्यालयमा सामान्य परिवारका बालबालिका अध्यन गर्ने भएकाले न्युनतम आवश्यकता पुरा गर्न कठिन हुने बताए । विद्यालय पोशाक निशुल्क प्राप्त गरे पछि अभिभावकले पनि अन्य आवश्यकतामा लगानी गर्न पाउने र यसले शैक्षिक गुणस्तर सुधारमा समेत टेवा पुग्ने बताए ।
जि एण्ड के इन्टरनेसनल एजुकेशन कन्सल्टेन्टका संचालक राजन पन्थीले संस्थाले विगतमा पनि सामाजिक कार्य गदै आएको र यस पटक पनि सरकारी विद्यालयमा अध्यन गर्ने बालबालिकालाई पोशाक वितरण कार्यक्रम राखिएको बताए । यसले पठनपाठनमा सहयोग पुग्ने छ । अभिभावकलाई सहायता प्रदान गर्ने र विद्यार्थीको आवश्यकतालाई ध्यान दिएर पोशाक वितरण गरिएको पन्थीको भनाई थियो ।
जि एण्ड के इन्टरनेसनल एजुकेशन कन्सल्टेन्टले फागुन १४ गते वार्षिकोत्सवको शुभकामना आदानप्रदनन विशेष कार्यक्रम गदैँछ ।
